Sarrera

 

Euskadi Irratiak eta HABEk ‘Euskara Hobetzen’ irratsaioa gauzatu dute 1999ko udazkena eta 2001eko uda bitartean, euskaldunen hizkuntz kalitatea hobetzeko asmoz.

Saiootan hizketagai izan ditugu azkenaldian Euskaltzaindiak eskaini dizkigun arauetako batzuk, eguneroko jardunean egin ohi ditugun akatsik zabalduenetako batzuk, eta, oro har, hiztunon jarduna hobetzeko baliagarri iruditu zaizkigun hainbat ohar eta gomendio.

Saioek, laburrak izaki, gai bakarra izan dute ardatz. Sarritan euskaldunon jardunetik jasotako okerrak nabarmendu ditugu, eta euskara egokian nola erabili beharko genituzkeen azaldu.

Horrela, bada, web gune honetan dituzu saio horiek guztiak, bai testu idatziak, baita irratsaio bakoitzari dagokion hotsa ere, nahi duenak gustukoen duena erabil dezan.

Gainera, irratsaio bakoitzaren bukaeran Gogoratu izeneko ataltxo bat erantsi dugu, hobetsitako formak erraz eta azkar gogoan har ditzazuen.

 

Hona hemen kontuan hartzeko hainbat ohar:

• Irratsaioetako izenburuek, gaia adieraztearekin batera, azaldu nahi den forma zuzena adierazten dute.
• Testu idatzietan bi kolore erabili ditugu, nagusiki:

Berdea:	forma zuzenak edota hobetsitakoak nabarmentzeko
	(Gogoratu atalean zeinuz azaltzen dena).
Gorria:	forma okerrak edota hobesten ez direnak erraz ikusteko
	(Gogoratu atalean zeinuz azaltzen dena).

• Beste batzuetan, berriz, irratsaioaren arabera, forma okerrik ez dugu eman, baizik eta kontuan hartzeko oharra soilik.
• Azkenik, ordenagailuko pantailan testua irakurtzerakoan, baliteke testua txikiegi edo handiegi ikustea.

Horrelakoetan, INTERNET EXPLORER programan sartu, eta IKUSI menua klikatu, eta zure ordenagailuak behar duen TESTU-TAMAINA aukeratu, ondo ikusi arte.