Edo "lepo eginda" ere bai! Esan beharrik ez "lepoa" zer den, burua enborrari
lotzen zaion atala, alegia, bizkaitarrek "iduna" edo "sama" esaten duten
hori. Baina, zer adierazi nahirik, edo zer esateko erabil dezakegu adizlagun
hori: "leporaino"?
Bada, erdarakada bat ordezkatzeko, besteak beste; hots, "nola" galderari
erantzunez erabili ohi den "a tope" delakoa, hain zuzen ere. Azken batean,
leporaino egon behar baikenuke horrenbeste "a tope" entzuteaz!
Ariketa txiki batekin ikustea izango da onena. Adibidez, bazkari eder
bat egin eta gero, "a
tope" ez baino, nola gaudela esan dezakegu?
Bada, "leporaino
gaudela, leporaino aseta", alegia, edota
"lepo eginda",
edo, baita ere, "bapo...
bapo nago, ba, oraintxe!"
Eta, tren bat jendez gainezka ikusten dugunean, nola doa tren hori,
"a tope"?
Ez, bada! "Leporaino
betea" doala esan behar.
