"Ormaiztegiko txakurrarena!"

 

Harridura, horixe izan daiteke gaurko esaldiaren atze-aurrean suma daitekeen jarrera edo sentimendua. Baina, jakin dezagun Ormaiztegiko txakurraren kontu hori.

Ormaiztegikoa delako ala txakurra delako edo, beharbada, biak batera delako? Batek daki! Kontua da inork uste baino azkarragoa dugula Ormaiztegiko txakurra. Izan ere, abiatu... beste guztien atzetik abiatu, eta, azkenean, bera izan ohi da lehen edo aurrena.

Beste guztiak pasa eta atzean utzi dituelako?

Jakina! Atzetik abiatu, aurrekoen parera etorri, eta, azkenean, hauek ere jo eta pasa! Horregatik, esaldi osoa "Ormaiztegiko txakurrarena: jo eta pasa", galtzen hasi eta bukaeran garaile gertatzen direnen jokaldi edo dena delako balentria aipatzeko.

Jar dezagun adibideren bat.

 

Esate baterako, jokoan ari bagara —musean, adibidez—, eta galtzen zebilen baten bat jo eta irabazten hasten bada, eta, azkenean, denen aurretik jarriz gero, zera esan genezake: "honek egin digu orain Ormaiztegiko txakurrarena: jo eta pasa".