"Harritzeko moduak"

 

Harridurazko esaldiez aritu behar dugu gaur; hau da, hizketan ari garenean senti dezakegun mina, nahigabea, poza, gorrotoa, harridura, ezustea, larritasuna, etab. adierazteko erabiltzen ditugun esaldiez.

Harridura-ikurraz idatzi ohi ditugu, eta guztiz garrantzitsua da doinu egokian ahoskatzea. Adibidez, "ene!", "bai horixe!", "bai polita!", "zein handia!", "baietz asmatu!"

Esaldi guztiok guretzat ezagunak. Baina, aditz batez bukatzen ditugunean sortzen da arazo txiki bat, eta, noski, gaztelaniaren eraginez sortu ere.

Halaxe da. Esaldi hauetako bakoitzaren ondoren erlatibozko atzizkia erantsi behar zaio aditzari, eta, hortaz, ez esan:

• "Zein handia da!", baizik eta "zein handia den!"
• Eta ez esan, "nolako ziria sartu didazu!", baizik eta "nolako ziria sartu didazun!"
• Edota "baietz asmatu zein etorri da!" esan ordez, esan dezagun "baietz asmatu zein etorri den!"

"Zein handia den!"

"Zein handia da!"