Har dezagun perretxiko baten adibidea. Kartel batean, pozoitsua dela
eta ez jateko adierazten duen perretxiko baten irudiaren azpian, ontzat
emango al genuke "hilkorra" hitza irakurriko bagenu?
Izan ere, "hilkorra" hiltzen dena da, eta, kasu honetan, badirudi perretxiko
hori "hilgarria" edo "hiltzailea" dela esan nahi dugula.
Adibide bat besterik ez da aurreko hori; hain zuzen ere, "-kor" atzizkia
sarritan "-garri" atzizkiaren kaltetan erabiltzen dugula ohartzeko.
"-kor" pasiboa genuke eta "-garri", alderantziz, aktiboa, eta biak ondo
bereizi behar dira.
Ea ariketatxo batek laguntzen digun! Esango al genuke "erabakiorra
izango da gaurko bilera"?
Ez, "erabakigarria" izango dela esan beharko dugu: "erabakigarria
izango da gaurko bilera".
"Produktu hilkorra saldu zuten..."
Ezta ere; "produktu
hilgarria saldu zuten".
Eta azken esaldia: "talde
erasokorra zelairatuko du Toshack-ek".
Ez, bada! "Talde
erasotzailea", edo erasoan jokatuko
duen taldea zelairatuko du.
