Demagun
euskaraz talde bateko kideak zein diren esan nahi dugula. Nola esan
"Itsaso eta ni" ala "Itsaso eta biok"?
Euskaraz
talde bateko kideak zein diren esateko, plural hurbilean deklinatutako
zenbatzaile bat erabiliko dugu, taldea osatzen dutenen kopurua adierazteko.
Adibidez, eta aurreko galderari erantzunez: "Itsaso
eta biok joango gara" esango dugu.
eta hori bezalaxe: "Nekane, Kontxi eta hirurok geratuko gara hemen",
edo "Julen, Beñat, Ana eta laurok etxe berean bizi gara".
Beraz,
begien bistan dagoenez, hiru lagunek osatutako taldea denean, "halako,
halako eta hirurok" formula erabiltzen da; eta lau badira, berriz,
"…eta laurok" etab. zer esan, ordea, esapide hauen deklinabideari
buruz?
Bada,
behar izanez gero, esapide hauek deklinatu egiten dira; beti plural
hurbilean, jakina. Esate baterako. "Zuk
eta biok egingo dugu hori", "amaren eta bion artean egingo
dugu", edo "Idoiari
eta bioi egingo digute soinekoa".
Beraz,
esandakoaren arabera: "halako eta ni" edo "halako, halako
eta ni" esatea dagoen bezala, "Andoni eta biok", edo
"halako, halako eta hirurok" esan genezake, euskara ederrean.
