"Anaia ikusteko gelditu"

 

 Erdarakada bat dugu gaur ere solasgai: "anaiarekin gelditu naiz plazan seietan". Nola esango genuke hori, edo nola esan esaldi horren mezuaren antzekoak euskara hobean?

 Hegoaldeko tradizioari erreparatuz gero, baditugu esaldi bat baino gehiago ere. Adibidez: "biharamunean ikusteko gelditu ziren", edo "gaur eramatekotan gelditu nintzen", edo "hamarretan elkartzekotan gelditu da" etab.

 Hortaz, "anaiarekin gelditu naiz plazan seietan" esan ordez…

 "Anaia seietan plazan ikusteko gelditu naiz", edo, bestela, "anaia seietan plazan ikustekotan gelditu naiz".

Dena dela, beste modu bat frantsesarena da, Iparraldeko "hitzordua", gaztelaniaren "cita"-ren ordezkoaren bidetik egiten dena. Alegia: "Anaiarekin hitzordua dut seietan plazan".

 

"Anaia seietan plazan ikusteko gelditu naiz" "Anaiarekin hitzordua dut seietan plazan"

"Anaiarekin gelditu naiz plazan seietan"