HABEko aginte-organoak hauek dira:

. Zuzendaritza Batzordea
. Batzorde Akademikoa
. Zuzendaritza Batzordeburua
. Zuzendari nagusia

a) Zuzendaritza Batzordeak du Erakundearen ordezkotza, eta berari dagokio funtzionamendu-arauak ezartzea eta HABEren xedeak bete daitezen arduratzea.

Zuzendaritza Batzordeko kideak honako hauek dira:

• Batzordeburua: Kultura Sailburua
• Batzordeburuordea: Hizkuntza Politikarako Sailburuordea
• Idazkaria: HABEko zuzendari nagusia
• Bokalak:
  • Foru Aldundien ordezkari bana
  • Kultura Sailaren bi ordezkari
  • Euskaltzaindiaren ordezkari bat
  • Herri Arduralaritzaren Euskal Erakundearen ordezkari bat
  • Euskaltegi publikoetako irakasleen bi ordezkari
  • HABEko zerbitzuetako pertsonalaren ordezkari bat

b) Batzorde Akademikoari, gai akademikoetan eta pedagogikoetan analisiak egitea eta euskaltegien jardueren ebaluazioa dagozkio eta, orobat, HABEren Urteko Memoriaz informatzea.

Batzorde Akademikoak, HABEko zuzendari nagusiaren burutzapean, honako kide hauek ditu:

• HABEko Hizkuntzaren Didaktika zerbitzuburua
• HABEko bi didaktika-teknikari
• Euskaltegietako zuzendarien sei ordezkari

c) Zuzendaritza Batzordeburuari, HABEko Presidentea denez, dagozkio: Erakundearen ordezkotza ofiziala, HABEk ematen dituen zerbitzuak gainbegiratu eta koordinatzea, eta Zuzendaritza Batzordearen erabakiak bete daitezen arduratzea.
HABEko Zuzendaritza Batzordeburua Kultura Sailburua da.

d) HABEko Zuzendari Nagusiari dagozkio Zuzendaritza Batzordeburuari laguntzea HABEren xedeen gainbegiraketan, Zuzendaritza Batzordearen erabakiak gauzatzea, Erakundea kudeatzea eta Urteko Memoria lantzea.

HABEko zuzendari nagusia Joseba Erkizia Itoitz jauna da.

1.- Hizkuntzaren didaktika zerbitzua
Helduak euskalduntzen eta alfabetatzen diharduten euskaltegien jarduna hobetzeko asmoz, didaktika-alorreko zerbitzua eskaintzen du, oinarrizko kurrikuluaren diseinua eta garapena, ikasmaterialen sorkuntza, irakasleen etengabeko prestakuntza, euskaltegietan aholkularitza eta jarraipen didaktikoa sustatu eta koordinatuz.
Eginkizun horiek ondorengo atalen bitartez betetzen ditu:

1.1.- Kurrikuluaren garapena
Helduen alfabetatze/euskalduntzea sustatzeko eta hobetzeko, oinarrizko kurrikulua diseinatzea eta euskaltegietan berori garatzeko baliabideak eskaintzea du bere zeregin nagusia, horretarako euskaltegiaren kurrikulu-proiektua burutzeko formazio-plana diseinatu eta eskainiz. Halaber, plan eta egitasmoen bidez, euskaltegiei beren antolaketa eta kudeaketa hobetzen laguntzen zaie.

1.2.- Ikasmaterialak
Euskaltegiei material didaktikoaren arloko zerbitzua luzatzen die, kurrikuluaren aplikaziorako langai egokiak sortuz, euskaltegietan materialgintza-proiektuak eta unitate didaktikoen elkartrukea sustatuz eta feedbacka emanez. Bestalde, materialgintza bultzatzeko xedez, benetako materialen bankua osatzen du, mass-medietatik hartutako dokumentuak sailkatuz.

1.3.- Prestakuntza
Euskaltegietako irakasleen prestakuntza eta euskaltegien formazio-proiektuak sustatu eta ahalbidetzea du zeregin nagusi. Eta horretarako hiru eratako formazio-zerbitzuak, izatez desberdinak baina elkarren osagarri ditu Prestakuntza Atalak gaur egun: formaziorako ekintza akademikoak; aholkularitza eta adituen kontrataziorako laguntza; eta prestakuntzarako argitalpenak.

1.4.- Programa bereziak
Euskararen ikaskuntza, hobekuntza eta erabilera bultzatzeko, euskaltegietan agizkoak ez diren egitasmoak diseinatzea edo bultzatzea du xede, batez ere, euskalduntze-alfabetatzegintzaren ikuspuntutik: lan-munduko erabilera-planak, egonaldiak familia euskaldunetan, irratsaio bereziak, jarraipen-programa.

1.5.- Baliabide didaktikoak
Helduak euskalduntzeko eta alfabetatzeko ikusentzunezko langaiak sortu, zabaldu eta irakasleak beroien erabileran trebatzen dihardu.

1.6.- Argitalpenak
Bi arlo nagusi ditu atal honek, ikasleei zuzendua bata eta bestea irakasleen formaziora bideratua. Lehenengoari dagokionez, euskara ikasten ari direnentzako lagungarri gisa argitaratzen da HABE aldizkaria: lau mailatan sailkatua zailtasunaren arabera eta alderdi didaktikoa ere lantzen duena. UNESCOren Albistariak irakurtzeko nahiz mintza-saioetarako hainbat gai interesgarri eskaintzen dizkio ikasleari. Irakasleari begira, HIZPIDE aldizkariak didaktika-alorreko gaiak jorratzen ditu. ITZULPEN SAILA deituriko atalak, berriz, hainbat didaktika-liburu interesgarriren euskarazko itzulpena eskaintzen die irakasleei.

2.- Kudeaketa zerbitzua
Erakundeko beste zerbitzu eta atalei laguntzea du eginkizun, HABEren egitekoak zuzen bete ditzaten, legearen, ekonomiaren eta, orohar, prozedura edota administrazio-arloetan egoki den guztian.
Eginkizun horiek ondorengo atalen bitartez betetzen ditu:

2.1.- Ikuskatzailetza
Euskaltegien administrazio jarduera koordinatu eta gainbegiratzeaz arduratzen da, euskaltegiek bete beharreko baldintzak bete ditzaten eta dirulaguntzak emandako helburuetarako erabiltzen dituztela zainduz.

2.2.-Informatika
HABEko beste atalek zein euskaltegi guztiek behar duten laguntza eskaintzen du, behar diren datu-bankuak sortu eta egunean izateko, euskaltegien datuak aztertzeko eta arlo akademikoan zein administraziokoan sortzen diren beharrei erantzuna errazteko.

2.3.- Ekonomia eta administrazioa
HABEren ekonomi eta administrazio-kudeaketaz arduratzen da, aurrekontuen jarraipena, kudeaketa eta kontrola eginez, eta kontratazio-espedienteak bideratuz.

2.4.- Lege eta langileen arloa
Lege-aholkularitza, HABEk hartzen dituen xedapen eta burutzen dituen egintza administratiboei buruz iritzia emanez, eta euskaltegien Errejistroa kudeatuz. Bestalde, langileen lansariak eta beste administrazio-alderdiak ere kudeatzen ditu.

2.5.- Harrera eta informazioa
Atal honi dagozkio jendeari zuzeneko atentzioa ematea eta HABEren Errejistroa eramatea.

2.6.- Liburutegia
Honen eginkizunak dira HABEren liburutegia kudeatzea, materiala liburutan edo beste edozein euskarritan biltzea, liburuen katalogazioa egitea eta dokumentu-baseak sortzea, ondare bibliografikoa zabaltzen koordinatzeko, maileguak kudeatzeko eta HABEko beste atalei nahiz kanpoko jendeari informazioa emateko.

2.7.- Itzulpen eta zuzenketa
HABEn sortutako idazki eta agirien hizkuntz zuzentasuna egiaztatzeaz arduratzen da, behar diren itzulpenak eginez.

2.8.- Funtzionarien euskalduntzeko koordinazioa
Herri Administrazioetako langileak euskalduntzeko helburuarekin izenpetzen diren hitzarmen eta akordioei dagozkien izapideak betetzeaz arduratzen da.